امریکی صدر ڈونلڈ ٹرمپ نے ایران کی جانب سے آبنائے ہرمز کھولنے اور مذاکرات میں مؤثر ثالثی پر پاکستان، وزیراعظم شہباز شریف اور فیلڈ مارشل عاصم منیر کی کاوشوں کو سراہتے ہوئے انہیں خراجِ تحسین پیش کیا ہے۔
سوشل میڈیا پر اپنے ایک بیان میں انہوں نے کہاکہ میں پاکستان، وزیراعظم شہباز شریف اور فیلڈ مارشل عاصم منیر کا شکر گزار ہوں۔
انہوں نے کہاکہ وزیراعظم شہباز شریف اور فیلڈ مارشل سید عاصم منیر دو زبردست شخصیات ہیں۔ ان کا کہنا تھا کہ آج دنیا کے لیے شاندار دن ہے۔
یہ بیان ایسے وقت میں سامنے آیا ہے جب خطے میں ایران اور خلیجی ممالک کے درمیان کشیدگی میں کمی اور سفارتی حالات میں بہتری کے اشارے مل رہے ہیں۔
اس سے قبل اپنے پیغام میں ٹرمپ نے کہاکہ ’سعودی عرب، متحدہ عرب امارات اور قطر، آپ کی بہادری اور مدد کے لیے شکریہ‘۔
تجزیہ کاروں کے مطابق حالیہ پیش رفت بشمول آبنائے ہرمز سے متعلق صورتحال میں نرمی، مشرقِ وسطیٰ میں مجموعی طور پر تناؤ کم ہونے کی جانب ایک اہم قدم سمجھا جا رہا ہے۔
واضح رہے کہ اس سے قبل ایران نے آبنائے ہرمز کو مکمل کھولنے کا اعلان کیا ہے، جس پر صدر ٹرمپ نے ایران کا شکریہ بھی ادا کیا۔
